治療時機勿錯過|臨床腫瘤科李智仁醫生

唔少胃癌患者多數喺晚期階段先察覺到病情，主要原因係早期胃癌未必有明顯病徵。究竟點樣先可以把握到治療時機，避免病情發展到不可逆轉階段呢？

原來，胃部體積相對其他器官大，加上胃內無神經線，而且具有彈性，即使有腫瘤在內，除咗可能導致貧血，患者都未必可以即時察覺得到。相反，當胃癌發展到晚期，病徵會更趨明顯，例如腹水、暴瘦同食慾不振，癌細胞更會擴散到其他身體器官，例如骨骼，引起骨痛情況，經檢查後就會發現係胃腫瘤所致。

若然能夠喺早期階段洞悉病情，可以透過手術切除腫瘤達到根治效果。不過，由於手術未必能夠徹底清除所有癌細胞，故此部份患者術後需要接受輔助化療，減低日後復發機會。晚期患者則需要接受系統性治療，例如化療再配合免疫治療或標靶藥物，目的是殺死癌細胞及控制腫瘤生長。

要達到早診早治，定期接受身體檢查係必要手段。雖然本港暫無胃癌篩查計劃，但我哋可以因應自己身體狀況、年齡同各種風險因素（吸煙、飲酒、家族病史及幽門螺旋菌等），考慮自行安排接受相關檢查。如果發現胃部持續不適，當然要盡早求醫，以免延誤病情。

来源：肠胃癌防治攻略